पत्रपत्रिकाबाट

मन्त्रालय र मन्त्री निवास तयार

धनुषा, फागुन ९ — जनकपुर चुरोट कारखाना (जचुकालि) को चार तले अधिकृत निवास भवनमा प्रदेश २ का चार वटा मन्त्रालय स्थापना गरिएको छ ।

पहिलो तलामा सामाजिक विकास, दोस्रो तलामा आर्थिक मामिला तथा योजना, तेस्रो तलामा आन्तरिक मामिला तथा कानुन र चौथो तलामा उद्योग, पर्यटन वन तथा वातावरण मन्त्रालयको बोर्ड झुन्ड्याइएको छ । मन्त्रालयलाई सुविधासम्पन्न बनाउन कर्मचारीर कामदार खटिएका छन् । टेबल–कुर्सी र सोफाले मन्त्रीको कार्यकक्ष सजाइएको छ ।

लामो समयदेखि बन्द रहेको जनकपुर चुरोट कारखानाको आवासीय क्षेत्रमा प्रदेश मन्त्रालय, मन्त्री निवास र अन्य बन्दोबस्त मिलाउने काम तीव्र बनेको छ । संरक्षण अभावमा जीर्ण जचुकालिको भवनले नयाँ रूप पाएको छ । ‘दुई–चार दिनमै मन्त्रालय र मन्त्रीको निवास तयार हुन्छ,’ मर्मतसम्भारमा खटिएका एक कर्मचारी भने, ‘मन्त्रालय र मन्त्री निवासरहने सबै भवनलाई मर्मत गरी रंगरोगन गरिएको छ ।’

जचुकालिका वरिष्ठ अधिकृत बस्ने चार वटा क्वार्टरलाई मर्मतसम्भार गरिएर मन्त्रीको निवास बनाइएको छ । ती चार वटै क्वार्टर भवनमा एकै प्रकारको रंग, कार्पेट, फर्निचर लगाइएको छ । मन्त्री निवासको तल्लो तल्लामा एउटा बेडरुम, बैठक कक्ष, किचन रहेको छ भने माथिल्लो तलामा मन्त्रीको बेडरुम बनाइएको छ । मंगलबार बिहानैदेखि मन्त्रालय र मन्त्री निवासलाई अन्तिम रूप दिन आँगनमा इँटा ओछ्याउने काम भइरहेको छ ।

जचुकालिको कम्पाउन्डभित्र प्रदेश २ का मुख्यमन्त्री तथा मन्त्रिपरिषदको कार्यालय र आवास, प्रदेश प्रमुखको कार्यालय र आवास, चार वटा मन्त्रालय र मन्त्रीहरूको आवास राखिएको छ ,आजको कान्तिपुर दैनिकमा समाचार छ ।

२०७४ फाल्गुण ८ गते मा प्रकाशित

तपाईं हामीसंग फेसबुकट्वीटर मार्फत् पनि जोडिन सक्नुहुन्छ ।

यसमा तपाईको मत