खेलकुद

जहाजमा जान पैसा भएन, रेलबाटै पाकिस्तान जाँदै विश्वकप खेल्ने नेपाली टोली

विश्वकप खेल्न जाने खेलाडीले हवाइजहाजको टिकट किन्ने पैसा पाएनन् । ४ दिनको रेलयात्रा गर्दैछन् ।

जनवरी ८ तारिख अर्थात पुस २४ गते विश्वकप प्रतियोगिता छ, टोली पुस २२ गते मात्रै पाकिस्तान पुग्दैछ । कुनै कारणले बाटो जाम भएमा खेलाडीले विश्वकप नै गुमाउन सक्छन् ।

यो कुरा झट्ट सुन्दा अनौठो लाग्न सक्छ । तर यो समस्या नेपाली नेत्रहीन खेलाडीले भोगेको साँचो कुरा हो । पाकिस्तान र युएइमा हुने पाँचौ नेत्रहीन एकदिवसीय क्रिकेटमा नेपालले पनि सहभागिता जनाएको छ । प्रतियोगिताकै लागि भदौदेखि नेपाली नेत्रहीन क्रिकेट टोलीले लगातार अभ्यास पनि गर्‍यो । तर नेत्रहीन विश्वकप क्रिकेट खेल्न पाकिस्तान जाने टोलीले हवाइजहाजको टिकट किन्ने पैसासमेत पाएन र रेलमार्फत पाकिस्तान पुग्दैछ ।

जर्सी, अभ्यासको लागि खेल मैदान र खेलाडीलाई खान बस्नको बन्दोबस्त मिलाएको नेत्रहीन क्रिकेट संघ नेपालले धेरै पहल गर्दा पनि जहाजको टिकट भने बन्दोवस्त गर्न सकेन ।

‘अहिले नेपालबाट पाकिस्तानसँगको सिधा उडान छैन, पाकिस्तान पुग्न दुबई हुँदै जानुपर्छ । यसरी दुबई हुँदै पाकिस्तान पुग्दा प्रतिव्यक्ति १ लाख ५० हजार रुपैयाँ लाग्ने भयो, यसरी त हामीलाई टिकटमै ३० लाख रुपैयाँ जति पर्ने भयो, तर हामीसँग पैसा नभएकाले सडकमार्गबाट पाकिस्तान जाने भएका छौं’ नेत्रहीन क्रिकेट संघ नेपालका अध्यक्ष पवन घिमिरेले गुनासो गर्नुभयो ।

नेपाली टोलीको पहिलो खेल यही पुस २४ गते बंगलादेशसँग छ । तर टोली मंगलबार मात्रै नेपालबाट हिँडेको छ । नेपाली टोली काठमाडौंबाट सुनौली बसमार्फत पुग्नेछ । सुनौलीबाट भने रेलमार्फत गोरखपुर, अमृतसर, भारत र पाकिस्तानको सीमा बाघा बोर्डर हुँदै नेपाली टोली पाकिस्तान पुग्नेछ । सीमामा कुनै समस्या नआओस भनेर नेत्रहीन क्रिकेट संघ नेपालले नेपालमा रहेको पाकिस्तानको दुतावाससँग सहकार्य गरेको छ । यसरी एकैदिनमा पाकिस्तान पुग्न सक्ने नेपाली टोली ४ दिनको सडकमार्ग हुँदै विश्वकप क्रिकेट खेल्न पाकिस्तान जाँदैछ ।

‘अरु जम्मै कुराको व्यवस्था भयो तर प्लेन टिकटको व्यवस्था गर्न सकेनौँ, तर हामीलाई प्लेन टिकटले छेक्दैन, विश्वकप जसरी पनि खेल्नुपर्छ भनेर हामीले ४ दिने सडकयात्रा तय गरेका छौँ’ नेत्रहीन क्रिकेट संघ नेपालका अध्यक्ष पवन घिमिरे उज्यालो अनलाइनसँग भन्नुभयो, ‘हामीले जति दुःख भोगे पनि नेपालको नाम राख्छौँ भन्ने भावना लिएर यो आँट गरेका हौं ।’

२०७४ पौष १९ गते मा प्रकाशित

तपाईं हामीसंग फेसबुकट्वीटर मार्फत् पनि जोडिन सक्नुहुन्छ ।

यसमा तपाईको मत