प्रवास

नेपाल जाउँ देश बनाउँ भन्दै प्रेम बानियाले गरे नेपाल फर्किने संकेत !

प्रेम बानियाँ लाई नचिन्ने नेपालीहरु सायदै कम छन् । कुनैबेला रवि लामिछानेभन्दा प्रेम बानियाँलाई बेशी मानिसहरु चिन्दथे । उनै बानियाँ एकाएक अमेरिका जाने निधो गरेपछि नेपालि सामाजिक सञ्जाल निक्कै तात्तियो र प्रेम बिरुद्ध अनेक लाल्छनाहरु लागे ।

ती यावत कुराहरुको डटेर सामना गर्दै करिब १ वर्ष अघि देखि प्रेम अमेरिकामा छन् र उनकै भनाईमा विस्तृत अध्ययनको लागि केही वर्ष बस्नेछन् र नेपाल फर्किने छन् ! यसै सन्दर्भमा लाखौँ स्रोता र दर्शकको माया पाएका आफ्ना सुभ चिन्तकका लागि बानियाँ फेसबुकमा यस्तो लेख्छन् :

 

हजारौं प्रिय साथीहरुले फेसबुक अनि अन्य सञ्जालमा पठाइरहनु भएका सयौं म्यासेजहरु (जसभित्र गहिरो माया र आत्मीयता हुनुपर्छ) पढ्न र प्रतिक्रिया दिइरहन भ्याएको छैन (सकेसम्म कोसिश गरिरहेछु) यसप्रति माफी माग्दै सबैलाई यसै स्टाटसबाट सम्बोधन गर्ने प्रयत्न गर्दैछु ।

हजारौं शुभचिन्तकहरु ‘लौन चाँडो नेपाल फर्किनुपर्यो’ भनिरहनु भएको छ । राजनीतिमा आएको नयाँ क्षितिजसँगै कतिपय राजनीतिकर्मीहरु, सरकारी सेवामा रहनुभएका व्यक्तित्वहरु, टेलिभिजन जगतका मेरा अनन्यहरु, सवभन्दा बढी त प्यारा दर्शकहरुले निरन्तर म्यासेजहरु गरिरहनु भएको छ र चाँडै नेपाल आउनुहोस् भनिरहनु भएको छ ।

एक शुभचिन्तक निलमनी भण्डारीले त ‘जनताको आँसुले पोल्ला, टुहुरो बनायौ’ जस्ता उच्चसमवेदनामा (म र मेरा प्रिय मित्र रबिजीका बारेमा) गीत गाएर यूट्यूबमा अपलोड गर्नुभएको भिडियोले नै मनमा पोलेको छ, छट्पटी त स्वभाविक नै छ । र, मैले यी सबैका प्रति केही न केही बोल्नैपर्छ जस्तो लागेर यो लेख्दैछु ।

देश र स्वाभिमानप्रतिको मेरो तपस्यामा एक इन्च पनि तलमाथि परेको छैन भलै, भन्नेहरुलाई बाटो छ । म झन् नजिक पुगेको छु र झन् बलियो बन्दैछु मेरो स्वाभिमानको उचाईतर्फ । मेरो मातृभूमिका निमित्त मैले जेजे आर्जन गरिरहेको छु, जेसुकै, कुनैपनि सर्तबिना देश र स्वाभिमानको हितमा मात्रै प्रयोग गर्नेछु । र, विदेसमा केही वर्ष पढ्न, सिक्न आएको ‘मान्छे’सँग यतिधेरै अपेक्षाहरु बर्सिरहँदा मेरो एउटा खास सपनामा साथ दिनका लागि सबैलाई अनुरोध गरिरहेको छु ।

सपना स्वदेशकै हो र स्वाभिमानकै हो । देश बनाउने सबैको साझा सपनाका लागि एक विशेष अभियानको । संसारभर छरिएर रहेका नेपालीबीच ‘स्वाभिमानी नेपालीका समूहहरु’ बनाउँदै क्रमश एक खास वातावरण निर्माण गरेर विदेशिएका धेरै नेपाली स्वदेश फर्किने अभियान । अनि स्वदेशमै श्रम र रोजगारीको वातावरण बनाउने विशेष अभियान । केही समय लाग्ला तर पवित्र उदेश्यका साथ देश र स्वाभिमानमा समर्पित यो अभियानमा विदेश र स्वदेशमा रहेका सबै नेपाली एक हुनुहुनेछ भन्ने आशा र भरोसा लिएको छु ।

बिदेशमा एक वर्ष र केही महिना बितेर गएको छ तर यसबीच स्वदेशमा धेरै प्रकारका परिवर्तनहरुको गाँज देखिरहेछु । हरेक क्षेत्रमा युवा पुस्ताको जबर्जस्त उपस्थिती प्रभावी बन्दैछ, यसले मलाई यतिधेरै आल्हादित बनाएको छ कि अब देश समृद्धिको बाटोमा अघि बढ्नुको कुनै विकल्प छैन भन्ने विश्वासको जग बसेको छ मनमा ! यसो हुँदैगर्दा मैले आफ्ना केही मिशनहरुलाई फरक गर्ने अभ्यास थालेको हुँ र जति समय बिदेशमा बस्छु स्वदेशकै लागि केही गर्ने कोशिसको प्रारम्भ गर्दैछु जसमा सबैको साथको आशा छ ।

संसारका कतिपय देशहरुमा हाम्रो टिम बनिसकेको छ र त्यसलाई हामीले ‘स्वाभिमानी समूह’ भनेका छौं, जस्तो कि स्वाभिमानी समूह (देश वा जिल्ला वा शहरको नाम) तपाईंहरु जोजो, जहाँजहाँ हुनुहुन्छ स्वतन्त्ररुपले स्वाभिमानी समूह बनाउँदै देश र स्वाभिमानका प्रति सकारात्मक कामहरु गर्दै जानुहोस् । तर, निर्मम् सत्यचाही यो कुनैपनि राजनीतिक दल, धर्म, जातजाति, वर्ग वा भेदहरुबाट माथि उठेर त्यस्तो पक्षपाती समूह बनोस् जसको ‘सवथोक’ देश र स्वाभिमान मात्र होस् ।

विदेश गएकाहरुसँग स्वाभिमान नै हुदैन भन्नेहरुलाई देशका प्रति सानाठूला काम गर्दै सकारात्मक जवाफ दिने मञ्च बनोस्, नेपालभित्र देश र स्वाभिमानका प्रति काम गर्ने युवाहरुको समूह बनोस् । यसरी संसारभर बन्ने हाम्रा समूहहरुले विदेशमा रहेका लाखौं नेपालीलाई स्वदेश फर्किने अभियानका लागि वातावरण बनाउँदै र मद्दत गर्दै जाओस् ।

तपाईले आफू रहनुभएको देश वा स्थानमा यस्तो समूह बनाउनु भएपछि सामान्य जानकारी आपसमा साटासाट गरिदिनु भयो भने आभार व्यक्त गर्दथें अन्यथा कसैलाई नभनीकन देश र स्वाभिमानका पक्षमा खुरुखुरु राम्रा कामहरु गर्दा पनि आनन्द बेग्लै हुन्छ ।

मलाई विश्वास छ, संसारभर छरिएर रहनुभएका नेपालीहरु स्वतन्त्ररुपले स्वाभिमानखातिरको यो पवित्र अभियानमा एकएक भएर जुट्दै जानुहुनेछ । र, यस अभियानबारेका जानकारीहरु क्रमश शेयर गर्दै जानेछौं ।

२०७४ पौष २ गते मा प्रकाशित

तपाईं हामीसंग फेसबुकट्वीटर मार्फत् पनि जोडिन सक्नुहुन्छ ।

यसमा तपाईको मत