ग्लोबल

उत्तर कोरियाद्वारा जापानको अकाशमाथि क्षेप्यास्त्र प्रहार

प्योङयाङ । उत्तर कोरियाले प्रहार गरेको पछिल्लो क्षेप्यास्त्र उत्तरी जापानको आकाश हुँदै समुद्रमा खसेको छ ।

स्थानीय समयअनुसार मंगलबार प्रहार गरिएको उक्त क्षेप्यास्त्र खसाल्न जापानले कुनै प्रयास भने गरेन । त्यसको साटो जापानले आफ्ना जनतालाई सुरक्षित बस्न आग्रह गरेको थियो ।

जापानका प्रधानमन्त्री सिन्जो आबेले क्षेप्यास्त्रलाई असाधारण चुनौती भएको बताएका छन् ।

पछिल्लो समय उत्तर कोरियाले जापानतर्फ लक्षित थुप्रै क्षेप्यास्त्र प्रहार गर्ने गरेको छ । तर, जापानको आकाशमाथि क्षेप्यास्त्र प्रहार भएको बिरलै पाइन्छ ।

गत शुक्रबार र आइतबार पनि उत्तर कोरियाले तीन छोटो दुरीको मिसाइल आफ्नो पूर्वी तटबाट समुद्रतर्फ प्रहार गरेको थियो ।

मिसाइल प्रहार भएपछि उत्तरी जापानमा खतराको आर्लामहरु बजाइ पनि पब्लिक ब्रोडकास्टर एनएचकेले यसबाट कुनै क्षति नभएको बताएको छ ।

पछिल्लो क्षेप्यास्त्र प्रहारले कोरियाली प्रायद्वीपमा थप तनाव थपिने विश्लेषकहरु बताउँछन् ।

दक्षिण कोरियाली सेनाका अनुसार पछिल्लो क्षेप्यास्त्र उत्तर कोरियाको राजधानी प्योङयाङ नजिकैबाट प्रहार भएको थियो ।

यसले ५५० किलोमिटर उचाईंसम्म पुगेर २७०० किलोमिटर दुरी तय गरेको थियो ।

क्षेप्यास्त्र जापानको होक्काइडो टापुमाथिबाट उडेर गएको थियो । त्यसपछि तीन टुक्रामा विभाजित भएर समुद्रमा खसेको थियो । 

२०७४ भाद्र १३ गते मा प्रकाशित

तपाईं हामीसंग फेसबुकट्वीटर मार्फत् पनि जोडिन सक्नुहुन्छ ।

यसमा तपाईको मत